Hula Christmas – Louise Bennett Coverley

Hula Christmas
Louise Bennett from Laugh With Louise

None-stop motion an commotio
Over Dina yard me Chile!
Her pickney dem enna dem saal,
Dem start see Christmas wile!

Dina sen de big gal dung-tun
Wid the seven lickle one,
Tell her fe buy dem Christmas clothes,
Put ten-poun’ in her han

Before she tink dem ketch tung,
Dem was back ina de place
Wid seven hula hoop a piece
A wiggle roun dem wais’!

Dem wine like wire, spin like gig
Dem yo-yo up an down
Dem meck breeze pon de spot reverse.
An Sputnik roun an roun

Like eight. syncopatin rainbow
Jusa merry up de air
Dem pretty, dem pretty, dem pretty so tell
We jus Stan up an stare

Till Dina bawl out “Pickney wat
Happen to me ten–pun?
Whe de shoes an socks an hat an frock
Yuh go fe buy dung tung?”

De rainbow corkscrew slow dung
Eight pickney voice halla,
“Nutten dung tong never sweet we
Like de hula-hoop Mama,”

Hear Dina, “but dem musa mad!
Is warra dem a sey?
Ten-poun note wut a hula-hoop!
Ah gwine kill dem tedeh!”

‘Ah gwine show dem wat gwine sweet dem’
Pass dah big–stick gimme deh!
Ah gwine lick dem pon dem hula
Till dem hoop in yah tedeh!

She pawn a junk a stick an lash out
Right an lef an cross,
Not a blow connect wid target,
Lawd, de pickney dem was class’.

Dem gather speed an circle weh,
Like peacock in de air,
Dina tired till she stagger back
An ketch her breat an swear

She gwine bun–up every slip an
Pants an shoes an socks an frock,
Meck dem seen christmas season wi
So–so hula pon dem back!

But dem pickney still in motion
Chrismus joy eena dem face,
An de Chrismus hula–hoop dem
Jus a simmer round dem wais’.