Bun an Cheese – Louise Bennett Coverley

Bun an Cheese by Louise Bennett Coverley
Excerpt from Laugh with Louise

Dem Bwoy dah jeer Miss Matty,
An a mock her an a tease,
Dem a kill demself wid laugh mah
An a call her Bun an Cheese.

Dem sey from Good Friday mawnin
Her jawbone no get no ease
Mawnin noon an night an bedtime
She was nyamin Bun an Cheese.

Fe breakfuss lunch an dinna
She got so–so bun an cheese
She kea it go a church an
Movin pictures if you please.

She no count salfish an ackee
Cut her y’eye pon rice an peas
Hear her “me put pot pon fire
When me got me Bun an Cheese!”

Easter time gwine come an go weh
Days an moment fly like breeze
But as long as Matty live dem bwoy
Gwine call her Bun an Cheese!